As persoas traballadoras por conta allea que estivesen afectadas por un ERTE en 2020 deberán declarar as prestacións recibidas porque se consideran rendementos de traballo e as retencións aplicadas polo Estado foron moi baixas. Na mesma situación atópanse os autónomos que recibiron axudas ao solicitar o cesamento de actividade do seu negocio.
En ambos os casos, deberán render contas coa Axencia Tributaria na próxima declaración da Renda cuxa campaña arrinca o próximo 7 de abril. A razón é simple: tanto as persoas en ERTE como as que solicitaron o cesamento de actividade -ou paro dos autónomos, estiveron cobrando as súas prestacións libres de retencións, o en xeral estas foron moi baixas. Agora deberán facer a declaración da Renda, para pagar, se é o caso os impostos que non lles descontaron nas retencións que aplicou o SEPE ou a Mutua.
O impacto no IRPF do ERTE e das axudas a persoas traballadoras autónomas resúmese nos puntos que expón a Axencia Tributaria e que che detallamos a continuación:
1-As prestacións derivadas dun Expediente de Regulación Temporal de emprego (ERTE) considéranse rendemento de traballo e como tal están suxeitas a gravame. Non están exentas do IRPF.
2- O cobro das prestacións derivadas dun ERTE implicará na práctica totalidade dos casos a existencia de dous pagadores. Deste xeito, se unha persoa obtivo durante o exercicio 2020 rendementos de traballo de dous pagadores distintos pódese atopar nestes dous supostos:
– Se o importe percibido do segundo e restantes pagadores non supera os 1.500 euros, non existirá obriga de declarar por IRPF se a suma total de rendementos do traballo non excede os 22.000 euros.
– Se o importe percibido do segundo e restantes pagadores supera os 1.500 euros, non existirá obrigación de declarar por IRPF se a suma total de rendementos do traballo percibidos no exercicio non excede os 14.000 euros.
Respecto da contía a declarar, a Axencia Tributaria inclúe todas as prestacións recibidas entre os mese de marzo e decembro de 2020, no caso de peches de actividade provocados con motivo da alerta sanitaria.
Se tes máis dúbidas ao respecto, podes solicitar o teu asesoramento gratuíto a través do formulario do Igape Responde.