Santiago de Compostela, 21 de xullo de 2022.- O soporte a persoas emprendedoras vaise materializar na orientación durante a fase de creación da empresa e tamén á hora de analizar a viabilidade do negocio. Ademais, no marco do programa, as persoas con novas ideas terán apoio na procura de fontes de financiamento que lles axude á creación do seu negocio. A través deste novo ámbito o obxectivo é aumentar o emprendemento en Galicia e ofrecer as máximas facilidades nesa primeira etapa da creación dun novo negocio.
Outra das novidades do Igape Responde é o ámbito de axuda aos investimentos a partir de 500.000 euros. Neste caso, as empresas e as persoas autónomas atoparán asesoramento gratuíto para implantar o seu negocio en Galicia. Para iso vaise ofrecer apoio na busca de localización, solo e naves industriais. Por outra parte, este ámbito inclúe axuda cos trámites administrativos, en aspectos como os procedementos ambientais e urbanísticos. O obxectivo é dar facilidades durante o procedemento de presentación de axudas, á hora de interpretar a normativa e visibilizar as axudas que mellor se adaptan a cada negocio, en función da súa tipoloxía.
O asesoramento do Igape Responde pode solicitarse a través do teléfono 900 815 151 e do correo igaperesponde@igape.es. Outra das vías para pedilo é a través do formulario dispoñible na páxina web do programa. O tecido empresarial e as persoas emprendedoras poden acceder ata a 17 tipos de medidas diferentes, que se implementan de xeito rápido nun prazo de dúas semanas. O soporte inclúe ademais un seguimento posterior dun mes cunha intensidade de 25 horas de consultaría personalizada.